大後備

朋友Ben在美國開餅店，最近回港探親。自從開了餅店之後，Ben便很少很少回來放假了。機會難逢，CK自然把握機會約他出來，聚一聚舊。

「冇辦法呀CK……」Ben坐在酒店Cafe的梳化上，嘆了口大氣：「我其實想返探下你好耐，不過我真係行唔開。今次我都係夾硬咋……」

「你行，真係咁困身？」我問：「如果成世人都要係咁，唔係好值喎……」「我都知，不過洗濕咗個頭，冇得唔玩落去。」Ben露出一副無奈的樣子：「你諗下，我開餅舖，好大程度上要靠個整餅師傅幫我做，咁佢有咩頭暈身，我就一定要頂上啦。我冇可能由得間舖頭開門時候冇賣吖嘛……」「所以你就永遠唔敢行開……」我點了點頭：「因為你要隨時backup你位師傅。」

「中小企係咁啦……」Ben越講越無奈：「又唔夠錢請多個師傅做Backup，即使請多一個，都一樣唔擔保佢唔會一齊病，到時我一樣又係走唔開。」

類似Ben這些小生意的問題，其實我想很多本地中小企的老闆都會遇到。公司裡人數少，每個人其實都很重要。只要其中一個同事放假又或者因事不能上班，整個公司的運作就幾乎接近癱瘓狀態。於是老闆就唯有變成通天後備，那個同事不上班，老闆便唯有走去暫代他的工作。這個感覺我也很明白，做生意的頭兩年，CK每天也有心理準備，去Backup那些因頭暈身而告假的同事。

人事問題往往對中小企造成很大的困擾，幸運地我捱過了這個階段，不過當時天天當同事們後備的CK，也真的試過因為不堪這份壓力而想放棄這盤生意。講到尾，老闆，也不是很多人想像中般容易當的。

(2007年12月7日 刊於AM730)