不是不能捱 (下)

「你依家班後生仔個個都唔肯捱…」Uncle喝了一口香片：「點會有機會成功？」

「唔肯捱？」我覺得Uncle的說話有點主觀，忍不住反駁說：「憑咩你覺得我唔肯捱先？即使我長大環境，比你當年嘅舒適，都唔可以就咁咬定我唔捱得吖。」

「你班後生，動不動就話轉工轉行，辛苦都唔制…」Uncle聽見我反駁他的說話，有點不滿：「唔係唔捱得係咩呀！」

「轉工轉行就一定係因為唔捱得㗎咩？」我說：「有部分可能係，不過有更多後生仔，轉工轉行唔係因為唔肯捱。你咁講，主觀掛！」

Uncle年青的時代，成功是靠長期忍耐和堅持而換回來的。經歷過成功的他們，在他們眼中，失敗的原因只有一個：就是「唔捱得」。幾十年之後，他們依然喜歡用這種眼光和標準去看人。

時代改變了，今日的年輕人，所面對的，並不是「肯唔肯捱」的問題，而是要「搵條正確路去俾自己捱」的困難。幾十年前的日子，機會是給予所有願意捱的人，但幾十年後的今天，年輕人連識別哪些是機會都有困難。社會變得太快，機會不再像從前般多。以前的人捱的時候雖然辛苦，但過程中總能看見曙光，給予他們訊息：「他們選的路是可以行下去」。這種訊息能給予人無比的力量，讓你不論多辛苦，也願意咬緊牙關捱下去。今天不少年青人，在社會上跌跌撞撞，為的都只是想找到一條可以行下去的事業路，過程當中他們看不見曙光，一直行也不知道自己是否行錯了路。時間不等人，一個不慎真的走錯了路，浪費了年輕的光陰，以後可能一生也要潦倒地過。你說現在的年青人不像上一代那樣捱得嗎？

我反而傾向相信，假若他們也看到曙光的話，為事業「捱」的決心，絕不會比上一代人差。

(2007年11月28日 刊於AM730)