2007年10月19日 星期五

年輕暴君 (下)

上司要駕馭下屬,從來都不是容易的事。CK的情況因為是自己創業,同事們由進來公司工作的一刻開始,就習慣聽令於CK。這樣的背景支持底下,去駕馭下屬比較容易,然而我還是覺得在駕馭下屬方面有點力不從心。Philip從過了身的父親手上接過公司,他公司裡任何一個伙計都比他有更多經驗,而且同事們一向習慣聽令於紅褲子出身的Philip父親,在沒有人撐腰和硬上馬的情況之下,要下屬「聽你支笛」難度之高,大家可想而知。

「我明白佢比我經驗好……」Philip嘆了口大氣:「不過總唔可以因為叻過我就所有都係佢話事。」

這個問題其實我倒有點體會,我有些同事覺得她們能力比CK高,經驗比CK多,所以她們覺得自己的想法就一定比我好。我也不排除她們的能力真的比我強,但公司是一個需要同事間互相協調才可運作的團體,老細可能縱使經驗能力都不及部分員工,不過這個協調的工作,老細因為身份的關係,始終是最佳的人選去做這種工作。假如員工都認為自己因為經驗比老細多,選擇「唔聽佢支笛」,機構之內沒有了協調,時間一久,公司必定無法生存。

「唔可以俾多時間,等夥計認同你能力咩?」我問。

「佢經驗比我多,係鐵一般事實……」Philip說:「再多時間一樣唔會令我經驗超越佢。不過即使我願意等,商業社會都唔會俾你等。我再唔將權力返響自己手上,任由佢繼續自把自為的話,公司好快就玩完喇。我情願響公司度做一個暴君,個個迫住要聽我講,好過做一個好好先生,但係睇住公司慢慢死亡……」我突然想,自古以來,暴君其實是這樣被迫出來的嗎?

(2007年10月11日 刊於AM730)

沒有留言: