2007年10月19日 星期五

年輕暴君 (上)

Philip比我年紀大少許,是我中學時的師兄。一直以來,Philip給我的印象都是斯斯文文,而且愛心爆棚。對朋友又有情有義。現在他跟我一樣,是一間約有三十名員工的中小企的老闆。唯一跟我不同的是,Philip並不是公司的創辦人,而是幾年前Philip父親因病去世,而是在「逼上梁山」的情況之下繼承父業。

「喂CK,我問你吖……」這天Philip約我去飲茶:「你伙計係因為認同你而聽你話,抑或係驚你怕你而被迫聽你話?」

「一半半啦……」我一邊咬著蝦餃一邊說:「話晒都係老細,些少點都有怕你。做乜咁問?」

「唉,我諗我伙計……」Philip嘆氣:「聽我話完全係因為怕我惡死。最近有個伙計劈炮唔撈,臨走前仲大鬧我係暴君。」

我望著眼前的Philip一臉無奈。坦白講,他對下屬惡死我其實早有所聞。是否去到他伙計所講的「暴君」程度,我不敢妄下判斷。不過很難想像平時陰聲細氣的Philip,在下屬面前會來個大變臉。

「CK,你自己創業,我情況你未必明白……」Philip說:「以前阿爸響度,我都冇諗住入去管公司。到佢突然走咗,我迫住接手,一大班老臣子見你一個後生仔,邊會聽你支笛?見你係新手,你係老闆又如何?咪一樣唔俾面你?」

我點了點頭。這個我很理解,中國人傳統的公司,「俾面」文化根深柢固,而且事事論資排輩。儘管這種傳統包袱很多時會窒礙公司發展,不過要改變這種傳統公司文化,又豈是一朝一夕可完成的事? (待續)

(2007年10及11日 刊於AM730)

沒有留言: