公平的解釋 (上)

上一年CK調整同事們的工資時，同事A曾反映過：「喂老細，個人工加幅唔係唔好，但個個同事都係加咁上下銀碼，做得好個又係加咁多，做得唔好個又係加咁多，唔係好公平喎。你咁樣，我邊有心機做好呀？」

「你又拎人工出同其他同事比比去啦？」我皺了一皺眉：「你亂咁互相比較，盞傷大家感情。」

「想俾些少意見你啫老細……」同事A好像理直氣壯地說：「假如薪酬加幅差距明顯話，咁做得好同事會覺得受到多老細認同嘛……」

我說：「都唔係冇道理。咁下次做薪酬調整陣，我將同事間加薪幅度拉闊些少，等大家覺得薪金加幅更能反映工作表現好壞啦，OK？」同事A點了點頭，臨離開我房間前，更再三提醒我要遵守諾言。

對工作表現好的同事來說，她們都希望她們的努力能夠得到老闆的認同。而去證明老闆認同她們的表現，最實際又最明顯的方法，就是反映在她們的薪酬之上。我其實反對同事們比較薪酬，事關薪酬很多時候受許多不同因素影響。工作表現不是唯一影響薪酬的原因。但同事們都喜歡用薪金和每年的加幅，去量度老闆是否「公平」地對待各下屬。一牽涉有關「公平」的問題，事情就變得複雜了。同事們對「公平」的理解，亦會隨著時間和客觀環境而有所改變。至於如何改變，明天再續。

(2007年9月10日 刊於AM730)