2008年1月10日 星期四

當女人停下來

CK老婆的上司是個麻煩的中年女人。老婆每天返工,都被她的上司氣得七孔生煙。CK看見老婆返工做得唔開心,於是提議老婆不如考慮離開職場,轉做全職主婦。

朋友聽到我對老婆有這個建議,反應很大:「CK,你聽我講,你千祈唔好咁諗呀……女人一唔做,好多無謂諗啦……」其實類似的講法,我以前也聽過不少朋友講過。CK的老婆一直都是個職業女性,未知道假如真的有一天她離開職場的話,會否像朋友們所講,變得「有好多無謂諗」。

朋友的理據是這樣的:當女人一旦停止工作,她們的焦點,會由工作轉移到家庭生活。當她們還是個職業女性的時,面對每日變幻無常的商業社會,她們都能做出果斷而精明的決定,而且效率驚人。不過,當焦點由工作轉到生活時,她們將工作那一套認真和效率,都帶到去家庭,而這些認真非常的態度放在生活上,每每對身邊的家人,造成莫大的壓力。而這種壓力萬一失控起來,嚴重的話分分鐘可以影響婚姻。

「冇咁嚴重下話……」我抱著一點懷疑的態度:「我諗唔同人,離開職場之後都有唔同反應卦……」

「CK,你真係要信我……」朋友用力拍了拍我的肩膊:「真係無一幸免。我身邊,有好多親戚朋友,當老婆一唔返工,婚姻就亮紅燈啦。」

我沒有這方面的經驗,不知道現今社會的情況,是不是真的如朋友所講的那樣糟。不過聽罷朋友的說話,也許是說得誇張了,不過,好像也不是完全沒有道理。

你們又覺得怎樣呢?

(2008年1月10日 刊於AM730)

4 則留言:

Chris Kwan 提到...

CK兄 請問你這個專欄有沒有 RSS 架, 我想可以用 RSS 有時在部手機到睇呀

Becky 提到...

咁你個朋友真係講得冇錯架,可能聽落去覺得好誇張。因為我覺得自己都有呢個傾向!

咁其實我唔係咩女強人,都只係一個出左呢社會搵飯食一年幾o既小朋友呢架姐。

自從番左一份我覺得值得留低o既工之後,我日日番到公司都好似去打仗咁,咩都要快、狠、準。咁呢個正正係商業社會(仲有係我老闆)要求o既野。

咁放工番到屋企,我唔知係轉唔切channel,定係自己個思考方式已經改變左,唔覺得用左番工時果一套。

咁果一套就係,咩都要有明確答案同做法;其餘o既野,都係無謂,特別係一d講左同冇講係冇分別o既”廢話”。咁當你身邊o既人唔係同你一樣,咪製造左好多嘈交o既機會囉。

我諗你朋友o既意思係,多左時間o係屋企,就多左好多呢d機會。不過你老婆放工後不嬲都冇異樣,應該就唔會辭職後變哂o既。

小必理痛 提到...

其實都要睇你老婆意願嘅姐,有人慣左係戰場打打殺殺,返到屋企就百無聊賴;有人就厭左打打殺殺,希望長休但求身心平靜。

希望每個人都身心康泰啦。

林蘇 提到...

我太太以前有數十個手下任她指,現時當家庭主婦在家被對四歲孖仔指。她仍很開心。那真的要看你們的核心價值了。