年尾請人

「老細，過埋年好請多兩個人啦……」Kelly在pantry見到我：「真係唔係好夠人使呀。」「我知我知……」我沖了杯熱華田：「不過你都知，依家請人有幾難啦。出面搵緊工批，叫價高到偏離晒個market啦。」「唉，我知道喎……」Kelly點了點頭說：「咁唔夠人做都冇辦法喎……貴你都要請啦。」「俾貴人工，請一、兩個新人返，唔係問題呀……」我無奈地嘆了口大氣：「不過你點同其他同事交代，新人人工，仲貴過班有經驗嘅舊同事一截先？你都唔係唔知，大家搵幾多呢樣，冇咩秘密可言啦。到佢同新同事熟落咗，新同事份糧比佢份大呢個事實，實穿煲啦。」

我不是想孤寒，請兩個比市價貴的同事回來，解決人手問題，對公司的財政狀況其實影響有限。不過一個同grade、經驗比自己還少的新同事，居然還比一眾舊同事人工高這個問題，卻可以影響甚大。請了這種「高薪」新同事回來，人手的問題也許是短暫地解決了，不過卻埋下了個大炸彈在公司之內，對大家士氣和公司和諧的打擊，其實也是可以預期的。莫非為了聘請一個新同事，而要將幾十個舊同事的薪酬，一起調高至比市場高的水平？這總不可行吧？「所以我話叫你過年後先請囉……」Kelly拍了拍我膊頭：「而家出搵工人，如果仲有份工做緊，年尾會有bonus收。佢叫價咁高，係因為要份新工嘅人工，拉勻之後可以compensate到佢年尾轉工冇咗份bonus嘅損失，所以叫價咁貴。願者上釣囉。到年尾大部分人收咗bonus之後，求職者叫價，就會回落返啦……老細，我諗你真係太耐冇搵過工啦。」

(2007年12月3日 刊於AM730)